طب يعني احنا مش لاقيين ناكل اساسا احنا لسة طلبة مبنشتغلش هنطلع صدقة ازاي؟ =طب وفي حد قالك اتصدق بفلوس بس؟؟انا بقا هقولك ع 10 صدقات تعملهم مش بتدفع فلوس فيهم بس لحد ما ربنا ييسرها عليك عاوزاكوا تعملوا حاجتين عشان باذن الله الصدقة تتقبل اولا:"النية"نيتكوا تبقي صافية وانتوا بتعملوا الصدقة دي متبقوش بتعملوها وانتوا طمعانين ف ان اللي قدامكوا يقعد يشكر فيكوا ثانيا:تواظب عليها واول ما تمشي الفلوس ف ايدك تدفع وتادي صدقتك وتخلي اهلك يبطلوا يدفعوا مكانك لانك المفروض خلاص كبرت ومسؤلين عن نفسكوا شباب سواء او بنات -طب خلصي بقا قولي اي هما العشر صدقات دول؟ =براحة طيب اهم اهم:- 1-"التبسم والكلمة الطيبة"روي حديث عن الرسول صلي الله عليه وسلم يقول:(تبسمك في وجه اخيك صدقة) وروي(الكلمة الطيبة صدقة)يعني خليك وخليكي بشوشين ومبتسمين وكلامكوا جميل(بشروا ولا تنفروا) 2-"علم نافع ينتفع به":سواء بانك تعلموا ابن اختكوا او بنت اختكوا او اخوكوا الصغير او اختك الصغيرة مثلا قيمة من قيم الرسول او حفظ القران او تساعده ف انه يذاكر درس مش عارف يفهمه او يستوعبه.. 3-"زيارة مريض": قرايبك او جيرانك اي حد متعرفش انت زيارتك لمريض بتاثر فيه ازاي نفسيا وتخليه حاسس ان في حد بيهتم لحاله...انتظموا ع زيارة مرضاكم. 4-"التصدق بلبس قديم":عندك تيشرت قديم مش عاوزه اديه لحد غلبان..وانتي عندك طقم صغر عليكي اديه لبنت محتاجة او يتيمة،بس يبقي طقم حلو برضو وشيك كدا يعني حاجة كنتي بتحبيها عشان تبقي طبقتي حديث <لن تنالوا البر حتي تنفقوا مما تحبون> 5-"غرس شجرة":في البيت عندكوا حلبة ولا نبتة فول انزل ازرعها ف الشراع ياكل منها فقير او حيوان او اي حد الرسول عليه افضل الصلاة والسلام قال:ما من مسلم يغرس غرسًا أو يزرع زرعًا فيأكل منه طير أو إنسان أو بهيمة إلا كان له به صدقة. 6-سقي الماء:في رمضان انزل بازازيز ماية وبلح اول ما الاذان ياذن تشرب ماية وتاكل بلحة وبسرعة وزع كوبايات ماية وبلح ع الناس لقوله صلى الله عليه وسلم: "أفضل الصدقة سقي الماء" 7-"تصدقوا ع الجيران"انزلوا اسئلوا ع جيرانكوا اقعدوا معاهم اتطمنوا عليهم ده الرسول وصانا ع سابع جار وربنا قال:,,,, {وَالْجَارِ ذِي القُرْبَى وَالْجَارِ الجُنُبِ} وبالمناسبة بر الوالدين برضو وصلة الرحم صدقة يعني كلموا قرايبكم كل يوم يعني خالتك خالك عمتك عمك جدتك جدك كدا يعني 8-"التمر":متستغربش ايوة وزع تمر هات علبة تمر وانزل وزعها ع الناس وع صحابك دي كانت اجمل حاجة الرسول عليه الصلاة والسلام بيحب ياكلها وقال في حديث:"اتقوا النار ولو بشق تمرة."وهنا كان بمقصود ال 9-"اماطة الاذي عن الطريق":شوفتوا ازاز في الشارع ابعدوه،راجل عجوز او ست عجوزة عاوزين يعدوا الشارع اسندوهم وعدوهم،ممكن ف المدرسة انتي تتفقي مع صحابك تنظفوا الحوش لو هو مش نظيف وتكسبي ثواب باقية زمايلك لما يشوفوا الحوش نظيف مش عيب ع فكرة ،بلاش وانتي قاعدة ف بيتك روحي اغسلي المواعين نظفي الشقة دي اماطة اذي اللي هو عدم النظافة والملوثات. 10-"العفو عن المسيئين" لو تقدر تعفو عن حد مزعلك يبقي خير وبركة وتاخد حسنات وتعتبرلك صدقة بس المهم يبقي عفو عند المقدرة يعني متعملش كدا وانت مجبور او تقول لحد انا مسامحك بس انت من جواك مش مسامح وهكذا لان العفو بينشر الحب وبيتطابق مع تعاليم دينا السمح عَنْ أَبِي هُرَيْرَةَ رضي الله عنه عَنْ رَسُولِ اللَّهِ قَالَ: «مَا نَقَصَتْ صَدَقَةٌ مِنْ مَالٍ، وَمَا زَادَ اللَّهُ عَبْدًا بِعَفْوٍ إِلاَّ عِزًّا، وَمَا تَوَاضَعَ أَحَدٌ لِلَّهِ إِلاَّ رَفَعَهُ اللَّهُ» يبقي معاكوا بقا كدا يا جماعة 10 وسائل للصدقات مفيش حجج بقا ولا في حاجة اسمها معيش ادي حد ربنا مسهلك طرق الصدقات وباذن الله لما تمسك قرشين ف ايديكوا تتصدقوا بيها لوجه الله عفا الله عنكم وتجاوز عن سيئاتكم اللهم امين.. أستودعكم الله الذي لا تضيع ودائعه ،والسلام عليكم ورحمة الله وبركاته.. #لن_ابلغ_حتي_ابرح_الجنة
فرح سامح
برافو برافو عليكي بجد ربنا يباركلك الكلام حلو جدا الوفعل هيكون احلي استمري
ردحذف