
- إيه يبوعمو موحشتكش الحكايات الغريبة بتاعتنا؟
= ااااااه، هيصدعنا تاني.. إرغي يعم..
- تصدق أنا غلطان؟ روح إسمع حمو بيكا يلا..
= يعم متزقش بس، خلاص إتفضل يعم..
- روحت شلال قبل كده؟
= ( بيرجع راسه لورا ) يااااااه، فكرتني بالذي مضى، فمرة روحنا شلال الفيوم وكان معانا ستك سعدية والواد سيد سيكا إبنها وكان معانا مشبك وقع.
- آسف إني هقطع سيل الذكريات والمشبك والتلزيق ده كله، بس مش وقته يعني..
= اه روحت شلال يعم الفصيل..
- طيب عمرك سمعت عن شلال الشيطان؟
= إيه يجدع إنت في إيه! إنت جايبني عشان تخلي الناس تضحك وهي بتقرأ ولا عشان تخوفني!
- لامؤاخذة يبوعمو بس هي إسمها كده والله..
= لأ مسمعتش ومش عايز أسمع..
- يعم إسمعني أنا بس..
شلال الشيطان، شلال موجود في ولاية مينسوتا في أمريكا، بينبع من بحيرة سوبيريور، آه سوبيريور متبصليش كده..
= عايز أقلش ونبي ونبي..
- لأ مش ناقصاك أصلًا.. المهم، ده شلال عادي جدًا بس فيه مشكلة صغيرة..
احم، هو في واحد منه منعرفش هو بيصب فين.. بس :")
= إنت عبيط يبني؟ يعني إيه منعرفش بيصب فين؟ ويعني إيه واحد منه أصلًا دي..؟
- والله زي ما بقولك كده.. بص.. هحكيلك..
الشلال ده كبير، يعني حوالي ألف قدم وشوية.. بس بينقسم لفرعين.. وبالمناسبة، الإنقسام ده بيحصل قبل سقوط الماية مباشرةً بدون أدنى سبب مفهوم.. :")
طيب إيه اللي بيحصل بقى؟
اللي بيحصل إن واحد فيهم بيصب فالنهر بتاعه عادي جدًا.. والتاني منعرفش بيصب فين.. بينزل في فتحة صخرية كبيرة كده..
= طب الفتحة دي بتودي فين بقى يبوعمو؟
- صدقني أنا لو أعرف كنت قولتلك.. ( فادي عضلات )..
الفتحة دي نهايتها منعرفهاش.. اه والله منعرفهاش..
طيب العلماء كانوا بيعملوا إيه عشان يعرفوا؟
كانوا بيرموا كور بينج بونج صغيرة كده ويحاولوا يسمعوا صوتها لما تخبط.. ومكانوش بيسمعوا صوت.. متتريقش يمعلم الموضوع ده بيجيب فشخ بس إنت اللي متعرفش..
= طب الناس سابوا الموضوع ده في حاله؟
- مستحيل يبوعمو، هو كلام الناس بيخلص؟
جت ست عجوزة كده وقامت قايلالهم حاجة بليغة جدًا..
" النهر ده بيروي الناس اللي تحت الأرض اللهم احفظنا "
= بااااااس، أنا أمي كان عندها حق لما كانت بتقولي أخوك اللي تحت الأرض جعان..
- متحرقش المقالات الجاية وإخرس شوية..
جه واحد بقى بيفهم شوية بعيد عنك، من وزارة الموارد الطبيعية في مينسوتا، DNR, في فبراير ٢٠١٧.. وقالك هنعمل حاجة بسيطة أوي..
إحنا نقيس كمية الماية اللي المفروض تنزل، وكمية الماية اللي نزلت فعلًا وشايفينها..
يطلع إيه بقى يبوعمو؟ الكميتين قد بعض تقريبًا، ومعنى كده إن الماية بتطلع من الفتحة لمجرى النهر تاني، يعني حتى إخواتك اللي تحت الأرض شكلهم مبيشربوش ماية..
= طب يعم فين كور البينج بونج؟ مش المفروض تظهر الناحية التانية؟
- هو أنا مقولتلكش؟ ماهي إتكسرت..
أصل التيارات تحت الأرض بتبقى شديدة ولامؤاخذة يعني.. فبتقوم واخدة الكورة من هنا ودييييب تخبطها فحيطة تدشدشها..
----
أقولك على حاجة بره الموضوع بقى؟
من وسط كل المصادر اللي دورت فيها، مفيش مصدر واحد باللغة العربية بيتكلم عن التجربة اللي إتعملت، كل المصادر العربية جابت الخرافة، ومجابوش الحل..
عارف ليه؟ طب خليها في سرك عشان منتحبسش :")
روح إسمع حمو بيكا بقى.
***
المصادر ( بالإنجلش.. وأظن واضح ليه. :" ) :
ڤيديو بيتكلم عن الشلال والتجربة..
https://youtu.be/ZP0VFtVLJ9c
باقي المصادر : https://en.m.wikipedia.org/wiki/Judge_C._R._Magney_State_Park
https://www.mprnews.org/story/2017/02/28/hydrologists-solve-minnesota-devils-kettle-falls-mystery
https://www.google.com/amp/s/www.vice.com/amp/en_us/article/594byq/where-the-devils-kettle-waterfall-to-nowhere-really-goes
رابط صفحة الكاتب Omar Mohamed
👏🌺🌺هہآآآآيلﭾدآ... بـڛ ڣيڼ آڛ۾ ڝآحـبـ آل۾ﭰآلهہ؟
ردحذفهو نسي يكتبه شكله كده، أنا يبوعمو ��♥️
ردحذفوفي مقال تاني بإسم جزيرة الدمى، هتشرف بقراءتك ليه. ♥️
Omar Mohamed
قراته هايل جدا بتعجبني موضوعاتك استمر.
ردحذف