= أحموووس ...،
- أيوه يا ماما ...،
= يااض يا أحموووس ...،
- اديني اهو يا ماما
= شايف ابنك يا سقن مرضيش يرد عليا ازاي ..؟!
* انت ياض يا أحمووس
- أيوه يا بابا .. نعم يا ماما .. تؤمري بحاجة ؟!
= انزل هاتلي تمن كيلو ورق بردي ، عاوزة ابعت جواب لخالتك
* في نفس اللحظة تصل مسدج ع الواتساب إلي سقن رع *
= ما تورينا المسدج يا سقن يا ابن رع !*
- تلاقيها من بتاعة " أرسلها الي عشر أشخاص والا سيغضب عليك الإله حورس "
= لا أنا عاوزة أشوفها ..
- يوووه ، أهي ..ايه ده ..!*؟
من قائد الهكسوس إلي الأمير سقن رع .. مورنينج عليك يا سقن .. معلش لو كنت بعتلك المسدج في وقت مش مناسب .. مطولش عليك بقاا ، وأدخل في الموضوع علي طول ..، يا ريت تلم رجالتك ..عشان بالصلاة علي النبي .. جايين نحتلكم ..، واللي هنلمحه .. هنمرجحه .. خلص الكلام يا شقيق !*
= ايه هتسكتلهم يا سقن .. ده بيهددنا في عقر باقتنا !*
- لأ م أنا لو عملتله seen ومردتش هيضايق اكتر ..!
* يصل أحمس محضرا ورق البردي *
- هات ياض يا أحمس الورق .. بلا خالتك .. بلا نيلة .. اكتب عندك
- هيروغليفي ولا فرانكو يا بابا ..؟!
- فرانكو يا حبيبي عشان الهكسوس ميعرفوش يقروه .. اكتب "من الأمير سقن رع الي أمراء طيبة .. اجتماع عاجل بنادي امون الرياضي .. لمناقشة تفاصيل الحرب"
= هيهيي هيهييههي ابقي قابلني لو انتصرت ..!*
- ينظر اليها سقن نظرة ساخرة !* هاا
* تتوالي الأيام ويتفق الامراء علي الخطة *
سيفك في ايدك .. درعك معاك .. اللي يقولك هحتلك .. قطعه !*
* وسرعان ما يقتحم الهكسوس الاسوار ولا مؤاخده بعجلات حربية .. ايه ده .. ايه ده .. سقن اتقتل .. ملحقتش تتهني يابني .. الهكسوس انتصروا .. بركاتك يا إياح .. مصر هكسوسية ..*!
= أحمس .. هتفضل قاعد ع النت كده اليوم كله ؟!
- بعمل event ننزل نحرر مصر يا ماما ..
= ربنا معاك يا حبيبي وتجيب 10 الاف intention ..، وتكمل مسيرة سقن الله يرحمه ..!*
- ماما .. بصي العجلات دي .. من موقع سوق . كوم ، عجلات حربية انما ايه .. نضيفة ورخيصة ..!
= وماله يا حبيبي .. اشتري منها اللي عاوزينه وزيادة .. بس اطلبلي معاك شاحن ابرة لتليفون النوكيا بتاعي !*
- عنيا يا ماما
= تصل العجلات الساحة .. تحدث مشاجرات بين أحمس ومندوب المبيعات بسبب مصاريف الشحن .. يحاول موسي الثاني عشر اقناع المندوب بأن تنازله عن مصاريف الشحن يعد مساهمة وطنية ،!
تبدأ الحرب ..، تشتعل المنافسة .. ، إياح بتشجع ..، يمين .. يمين يا احمس ..، جووووول .. حورس عليك يا احمس ..، كنت فين من زمان .. ،كنت فين بندور عليك ..، كنت فين من زمان ..، كنت فين تسلم رجليك ،
باقي علي نهاية الماتش اسبوعين .. يا ريت نحاول نحافظ علي النتيجة دي قدر الامكان .. الجيش بيشجع .. ست إياح ..يا ست إياح .. حلوة الفتة يا ست إياح
إيه ده ..! أحمس ينسحب ..! الفريق كله بينسحب ..! هل الليلة هكسوسية ام أن في الأمر خدعة ؟! ناوي علي ايه يا احمس ؟! يا خوفي احسن يكونوا الهكسوس حطوا سم في الفتة ..!*
يطلق مجلس الامن الدولي صافرته معلنا انتهاء المباراة .. وفوز الهكسوس بالتزكية .. ليلة حزينة علي الشعب المصري ..،
يدخل أحمس لتهنئة الهكسوس .. الله علي الروح الرياضية .. إيه ده ..؟! ده داخل بالعجلات الحربية .. والست إياح داخلة بالشاحن .. أومال ؟! انتوا نسيتوا الشاحن ولا إيه ..؟! أيوه يا أحمس ..، علم عليهم ..، أحمس ينتصر .. الله عليك يابني .. رفعت راسنا ..! ورجعت أرضنا ..!*
دلوقتي بس نقدر نقول مبروك لمصر ولأهل مصر ، مبروووك علينا كلنا ..، كان معكم مدحت شلبي ..المعلق الرياضي لقناة عشتار سبورت !* والان أترككم مع الزميل كابو في الاستوديو التحليلي ..
شكرا ليك كابتن مدحت .. الليلة .. مصر بتفرح يا سادة .. انتصار ولا أروع .. معنا اتصال هاتفي .. مين ؟! أحمس .. بطل المباراة ..
= أحمس تحب تقول ايه لمصر وللمصريين ..؟!
- والله يعني .. مبروك لينا كلنا .. وبصفتي قائد الجيش .. احب أهدي الانتصار ده لوالدتي إياح حتب ، راعية الحرب والسلام في مصر ، هي اللي كانت بتشجعني دايما .. وتقولي عاوزاك تبقي احسن من ابن خالتك ..، أنا من موقعي هذا يا أمي .. وبشهادة المصريين أحسن من رمسيس ابن خالتي
= أكيد طيعا هي فرحانة بيك دلوقتي .. صحيح يا أحمس .. ايه اخبار الفتة ؟!
- ههههه ، كانت حلوة جدا ، من غير مجاملة ، تسلم ايد سيدة مصر الأولي اللي عملتها !*!
= وهكذا يا سادة كانت المرأة وستظل .. صانعة التاريخ ..!* ربنا يخليكي لمصر يا ست إياح ..!*
انزلي بأغنية " والله وعملوها الرجالة " يابني !*
نجلاء العارف
0 التعليقات:
إرسال تعليق