تعرفوا إن أول سيلفي في التاريخ اتاخدت سنة 1839م واللي خدها
لنفسه كان الأمريكي روبرت كورنيليوس. رغم إن
كلمة
Selfie انضمت لقاموس
أوكسفورد سنة 2013 بس.. لكنها
بتحصل بالتزامن مع بداية عهد التصوير الفوتوغرافي.. علماء النفس حللوا الظاهرة دي
بسبب إنتشارها الهايل في السنوات الأخيرة، مع وجود كل وسائل التواصل الاجتماعي دي.
لو رحت مكان سياحي أو أثري الناس بتصور نفسها أكتر ما بتصور المكان نفسه، وعلماء
النفس طبعا حبوا الموضوع أوي عشان هيخليهم يشتغلوا تعالوا نرجع لورا شوية، لأسطورة
(نارسيسوس) أو نرجس. ده كان
راجل حليوة، الستات بتتهبل عليه حرفيا.. واللي كان سبب في اعتقاده إن كل الستات
غبية ومملة، نارسيسوس محبش الستات على الإطلاق، ورغم إن الأسطورة ليها أكتر من
رواية بس واحدة منهم وهي اللي تخصنا كانت إن نارسيسوس في مرة وهو ماشي في الغابة
عدى على نهر، قعد عشان يشرب منه، وهوب شاف أجمل وش شافه على الإطلاق! إحم.. وشه هو! نارسيسوس وقع في غرام نفسه، مقدرش يمشي بعد ما خلاص لقى حب حياته!! ويقال إنه مات غرقان لما كان بيحاول
يحضن انعكاسه في الماية.. والزهور
اللي نبتت في المكان اللي كان قاعد نارسيسوس فيه وبيحب نفسه، اتمست بظهور النرجس.. "النرجسية" في علم النفس هي الحب الزايد للنفس، اللي بيمنع
الإنسان إنه يحب الناس التانية.. وكل شخص مصاب بالنرجسية بدرجة تتفاوت عن التاني. المهم درسوا علماء النفس تأثير
السيلفي وقالوا إنه بيزوّد الشعور بالسعادة، لكنه كمان بيزود العزلة، وعدم
الاندماج، وعدم الأمان.. طيب
اللي كل 5 دقايق بياخد صورة لنفسه ويشيرها، ده نرجسي؟ هنا اختلفوا وقالوا وليه ما
يكونش ده عشان أخلي الأخرين يحبوني؟ مش عشان بحب نفسي زيادة؟ لكن
"فرويد" تحليله للموضوع مختلف وهو إن حتى لو أنا مهووس بالسيلفي وبطلب
الاهتمام فده هيخليني عرضة للأمراض العصبية، لكن التأثير مش بس إيجابي يشملني
لوحدي، ده زي التدخين.. كمان فيه أثر بالسلب على الأخرين احساسك إيه وانت شايف
الناس وهم بياخدوا صور لنفسهم بعد تعديلها وهي بتظهر حياتهم مثالية، وسعيدة،
ومنمقة..؟ ده بيحطك تحت ضغط عشان تعمل زيهم، وتدخل دايرتهم، والفيزا والتأشيرة هي
سيلفي، وشيّر يا سيدي.. حب
الذات شئ صحي، لكن لحد معين، وبعدها بيتقلب لنرجسية، والعلماء قالوا إن فيه علاقة
وثيقة بين السيلفي، وظهور النرجسية ونموها عند الأشخاص.. النرجسية زادت في السنوات الأخيرة بنفس زيادة
معدل السمنة..
قبل ما ولد يعمل منشن
لبنت ويقولها بصي.. الرجالة -حسب الدراسات- نرجسيين أكتر من الستات.. رغم إن
الستات بتتصور وتشارك صورها أكتر. ياللا
.. 3 2 1 cheese
A'laa Mohammed
👏👏👏👏💜💜💜💜عاش بجد
ردحذف